大家新年過成點呢？又收咗幾多利是呢？雖然我生於一個大家庭，都有好多利是收，但係因為我結咗婚，同時都要派，所以都係打個和。我其實無乜所謂，嗰筆錢我都預咗要用，所以最緊要新年大家開開心心就得咖喇﹗
今日係連續假期0既最後一日，聽日就要開工喇﹗希望開工大吉﹗今日就把握假期時間，捉咗熊仁先生去Shopping﹗買咗好多衫呀﹗但都係黑色0既，點解呢？睇落瘦咗順眼啲？我都唔知點解，總之拎上手就係黑色，所以就買咗喇﹗最後同熊仁先生去咗買CD(你無睇錯我無講錯，係去咗買聽得嗰啲CD﹗)，話晒我都買咗一大堆衫，點都要比返少少甜頭佢買啲自己想買0既嘢0既﹗等佢同我同流合污嘛﹗哈哈﹗
 |
| 王菀之 - 晴歌集 (K2HD) |
終於都買咗呢隻金碟喇﹗其實平版CD我一早已經買咗﹗我係佢Fans，因為佢把聲真係好靚﹗但係呢隻碟真係我2013年最鍾意0既碟，非常好聽﹗知道佢出咗HD碟我都好爭扎買唔買好，但最後都係買咗﹗返到屋企即刻開嚟聽吓有乜唔同﹗原來真係唔同聲咖喎﹗靚聲好多﹗人聲又出好多﹗我都唔知點形容，有機會你地可以自己試聽吓﹗至於機0既嘢，係熊仁先生0既興趣，我都唔識，詳情你都係問返佢好啲﹗總之因為熊仁先生，搞到我聽歌聽到隻耳刁晒﹗真係衰﹗(偷笑)
打咗咁耐，我發覺打廣東話我係自在好多，又可以講多好多嘢﹗廣東話始終係我母語﹗咁我係咪要轉返打廣東話呢？
沒有留言:
張貼留言